1414. Oktober 30. Oberglogau

In dem Namen Gotes amen . . Wir Offka von Gotes gnaden herczuginne zu Opuln, Und fraw zu Obersten Glogaw etc. Bekennen Offenbar in dissem briffe allen die in sehen ader horen lesen, das für vns komen ist vnser getrawir Jakusch Erbfoyt zu Opuln vnd hat uorkouft recht vnd redlichen eyne marg jerliches czinses vmb czehen marg Pragischer groschen Polnischer czal auff seynem gute Saxrzaw, gelegen bey vnser Stat Opuln, auff alle Quatuortempora eynen firdung, den Erbern Juncfran, Priolinne vnd ganczem Convent zu Czarnowanst, vnd wo man nicht denselben czins eynen firdung gebe auff die fier Quatuortempora, das were eyne marg, dieselbe marg groschen sal man geben alle Jar auff Sand Mertens tag unvorczoglich, Und ab dieselbe marg groschen denselben Juncfran auff den tag nicht gege-ben worde also oben geschreben steet, So mügen dieselben Juncfran, Jakusch foytes gebawr, die her do hot zu Saxrzo, pfenden mit vnserm Pfender, Und mit den Pfanden thuen vnd lassen sam alle recht domete begangen weren. Ouch mag Jakusch foyt ader die seynen nesten nachkomlingen dieselbe marg czinses ab kofen wenne her mag, Umb czehen marg groschen der uorbedachten moncze vnd czal, Unschedlich Unsern fürstlichen dinsten vnd rechten. Des zu eynem bekenntnusse haben wir vnser Ingesigil an dissen briff lassen hengen, der geben ist zu Obersten Glogaw nach Cristi gebort firczenhundert Jar, dornach in dem firczenden Jare, an aller heiligen abende. Do bey seynt gewest die töchtigen vnsere lieben getrawen Niclas Langnaw heuptman zu Glogaw, Ludwig Stang, Jeschke Nascapp, Jeschke Groschewicz, Mikusch Korincz, Bernhard van der Oder, Und Petrus Däbraw vnser hofeschreiber, dem disser briff ward befolen.

Anhangend ein kleines rundes Siegel in einer Schale; es stellt eine stehende Frau mit einem Hunde dar, und hat die Umschrift: S. DOMINE. DVCISSE. DE. OPOL.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.